ಇಂದಿನ ವಿಶ್ವವಾಣಿಯಲ್ಲಿ (27/07/2025) ನನ್ನ ಕೃತಿ ಗಿಲ್ಗಮೆಶ್ ನ ಪರಿಚಯ/ವಿಮರ್ಶೆ

 ಇಂದಿನ ವಿಶ್ವವಾಣಿಯಲ್ಲಿ (27/07/2025) ನನ್ನ ಕೃತಿ ಗಿಲ್ಗಮೆಶ್ ನ ಪರಿಚಯ/ವಿಮರ್ಶೆ

ಸಾಹಸಿ ಗಿಲ್ಲಮೆಶ್

ನಿವೇದಿತಾ ಎಚ್. ಮೈಸೂರು

 

ನಾವು ಎಂದರೆ ಮನುಷ್ಯರಿಗೆ ಆಜೀವಪರ್ಯಂತ ಕಾಡುವ ಒಂದು ನಿಗೂಢತೆ. 'ಮರಣವೇ ಮಹಾನವಮಿ' ಎಂದು ಶರಣರ ಪರಂಪರೆ ಸಾರಿದೆಯಾದರೂ, ಸಾವಿಗೆ ಹೆದರಿದ ಯಯಾತಿ, ಪರೀಕ್ಷಿತ, ಹಿರಣ್ಯ ಕಶಿಪು, ಸಿಸಿಫಸ್ ನಂತಹವರು ಸೃಷ್ಟಿಸಿದ ಅವಾಂತರಗಳಿಗೆ ಜಗತ್ತು ಸಾಕ್ಷಿಯಾಗಿದೆ. ಅಂತಹುದೇ ಮತ್ತೊಂದು ಐತಿಹಾಸಿಕ ಹೆಸರು ಗಿಲ್ಗಮೆಶ್ ನದು. ಕ್ರಿ.ಪೂ. 2850-ಕ್ರಿ.ಪೂ. 2700 ರಲ್ಲಿ ಬದುಕಿದ್ದನೆನ್ನಲಾದ ಗಿಲ್ಗಮೆಶ್ ಸಾವನ್ನು ಗೆಲ್ಲಲು ಬಯಸಿದ್ದವನು.

 

ನಾಲ್ಕು ಸಾವಿರ ವರ್ಷಗಳ ಹಿಂದೆ ಮೆಸಪಟೋಮಿಯಾ ಅಂದರೆ ಈಗಿನ ಇರಾಕ್ ಮತ್ತು ಸಿರಿಯಾದಲ್ಲಿ ರಚಿತವಾಗಿ ರುವ ಗಿಲ್ಗಮೆಶ್ ಮಹಾಗಾಥೆ ಅತ್ಯಂತ ಪ್ರಾಚೀನ ಮಹಾ ಕಾವ್ಯವಾಗಿದೆ. ಅಕ್ಟೇಡಿಯನ್ ಭಾಷೆಯಲ್ಲಿ  ಕ್ಯೂನಿಫಾರಂ ಲಿಪಿ ಯಲ್ಲಿ ಬರೆಯಲಾಗಿದ್ದು ಜೇಡಿಮಣ್ಣಿನ ಫಲಕಗಳ ಮೇಲಿದೆ. ಗಿಲ್ಗಮೆಶ್‌ನ ಮೇಲೆ ಗೌರವ ಹೊಂದಿದ್ದ ಕ್ರಿ. ಪೂ. ಏಳನೆಯ ಶತಮಾನದಲ್ಲಿದ್ದ ದೊರೆ ಆಶುರ್ ಬನಿಪಾಲ ಈ ಮಹಾಗಾಥೆಯ ರಚನೆಯ ಹಿಂದಿನ ಪ್ರೇರಕ ಶಕ್ತಿ. ಅವನ ಗ್ರಂಥಾಲಯದಲ್ಲಿ ಸಿಕ್ಕ ಈ ಫಲಕಗಳನ್ನು ಮೊದಲು ಅರ್ಥೈ ಸಿಕೊಂಡು ಭಾಷಾಂತರಿಸಿದ್ದು ಜಾರ್ಜ್ ಸ್ಮಿತ್ ಎಂಬಾತ.

ಉರುಕ್‌ನ ಐದನೇ ದೊರೆಯಾಗಿದ್ದ ಗಿಲ್ಗಮೆಶ್ ದೈವಾಂಶ ಸಂಭೂತ, ಮಹಾ ಪರಾಕ್ರಮಿ; ಮಾತ್ರವಲ್ಲ, ಮಹಾಕ್ರೂರಿ, ಲೋಲುಪ, ನಿಷ್ಕರುಣಿಯಾಗಿದ್ದನು. ಇವನ ಕ್ರೌರ್ಯದಿಂದ ಜರ್ಝರಿತರಾದ ಜನ ಗೋಳಿಡುವುದನ್ನು ನೋಡಿ ಜನನದ ದೇವತೆ ಇವನಷ್ಟೇ ಪರಾಕ್ರಮಿಯಾದ 'ಎಂಕಿಡು'ವನ್ನು ಸೃಷ್ಟಿಸುತ್ತಾಳೆ. ದೇವಾಲಯದ ವೇಶ್ಯೆ ಶಹ್ಮತ್‌ ಳಿಂದ ಪ್ರಭಾವಿತನಾಗಿ ನಾಡಿಗೆ ಬರುವ ಎಂಕಿಡು ಮತ್ತು ಗಿಲ್ಗಮೆಶ್ ನಡುವೆ ಮಧುರ ಬಾಂಧವ್ಯವೊಂದು ಬೆಳೆದು ಇಬ್ಬರೂ ಸ್ನೇಹಿತರಾಗುತ್ತಾರೆ. ನಂತರ ಜೊತೆಗೂಡಿ ಹುಂಬಾಬ ಎಂಬ ದೈತ್ಯ ಮತ್ತು ಸ್ವರ್ಗದ ಹೋರಿಯನ್ನು ಕೊಂದು ವಿಜಯಶಾಲಿಯಾಗುವ ಇಬ್ಬರೂ ಉರುಕ್‌ಗೆ ಹಿಂತಿರುಗುತ್ತಾರೆ. ಶಾಪಗ್ರಸ್ತನಾಗಿ ಎಂಕಿಡು ಮರಣವನ್ನಪ್ಪಿದ ಮೇಲೆ ದುಃಖಿತನಾದ ಗಿಲ್ಗಮೆಶ್‌ನಲ್ಲಿ ಅಮರತ್ವದ ಅಮಲೇರಿ, ಅಮರತ್ವದ ವರ ಪಡೆದ ತನ್ನದೇ ಕುಲದ ಉತನಪಿಷ್ತಿಮ್‌ನನ್ನು ಹುಡುಕಿ ಹೊರಡುತ್ತಾನೆ. ಸಾಕಷ್ಟು ನೋವು ಕಷ್ಟಗಳ ನಂತರ ಉತನಪಿಷ್ತಿಮ್‌ನನ್ನು ಭೇಟಿಮಾಡುತ್ತಾನಾದರೂ, ಅವನ ಉಪದೇಶದಿಂದ ಜ್ಞಾನೋದಯವಾಗುತ್ತದೆ. ನಂತರ ತನ್ನ ರಾಜ್ಯಕ್ಕೆ ಹಿಂತಿರುಗಿ ಪ್ರಜಾನುರಾಗಿಯಾಗಿ ಆಳ್ವಿಕೆ ನಡೆಸಿ ಮರಣ ಹೊ೦ದುತ್ತಾನೆ.

ನಾವು ಓದಿರುವ ಸಾಕಷ್ಟು ಜನಪದ ಕತೆಗಳಿಗೆ ಹೋಲುವ ಗಿಲ್ಗಮೆಶ್‌ನ ಕತೆ, ಅದರಲ್ಲಿನ ಮನುಷ್ಯ ಸ್ವಭಾವದ ಸಾರ್ವತ್ರಿಕ 'ತೆಯನ್ನು ಸಾರುವುದರಿಂದ ನಮಗೆ ಆಪ್ತವೆನಿಸುತ್ತದೆ. ಮನುಷ್ಯ ಎಂಬ ಒಂದು ಹಣೆಪಟ್ಟಿ ಸಾಕು ಅವನ ಸ್ವಭಾವ ಏಕರೂಪವೆನಿಸಲು, ಅದನ್ನು ಗಿಲ್ಗಮೆಶ್ ಗಾಥೆ ಬಹಳ ಚೆನ್ನಾಗಿ ಕಟ್ಟಿಕೊಡುತ್ತದೆ. ಸಾವಿಗೆ ಹೆದರಿದ ಗಿಲ್ಗಮೆಶ್ ಅನುಭವಿಸಿದ ನೋವು, ಸಂಕಟ, ಆರ್ತತೆ, ದೈನ್ಯ, ಅಸಹಾಯಕತೆ ಎಲ್ಲವೂ ಮನುಷ್ಯ ಜನ್ಮದ ಅಂತಿಮ ಸತ್ಯವನ್ನು ಜೀವನ ಎಲ್ಲರಿಗೂ ಅರ್ಥ ಮಾಡಿಸುವ ರೂಕ್ಷ ಪರಿಯನ್ನು ಹೇಳುತ್ತದೆ. ಅವನು ಯಾವನೇ ಆಗಿರಲಿ, ರಾಜನೋ ಸೇವಕನೋ, ಸಾವು ಭೇದ ಎಣಿಸುವುದಿಲ್ಲವೆಂಬ ಸತ್ಯದ ಅನಾವರಣ, ಅಮರತ್ವ ತಂದೊಡ್ಡುವ ನಿರರ್ಥಕತೆ ಎಲ್ಲವೂ ಗಿಲ್ಗಮೆಶ್ ನ ಕತೆಯಲ್ಲಿದೆ. ಜೀವನದಲ್ಲಿ ನಾವು ಬದುಕುತ್ತಿರುವ ಕ್ಷಣವಷ್ಟೇ ನಮ್ಮದು ಎಂಬ ಸತ್ಯವನ್ನು ಮನಗಾಣಿಸುವ ಪ್ರಯತ್ನ ಈ ಕಥನದಲ್ಲಿದೆ.

ಪುರಾಣಗಳು ರಂಜನೀಯ ಮತ್ತು ಸ್ವಾರಸ್ಯಕರ ಹಾಗೆಯೇ ವೈವಿಧ್ಯಮಯ ಕೂಡಾ. ಗಿಲ್ಗಮೆಶ್ ಕೂಡಾ ಅದಕ್ಕೆ ಹೊರತಲ್ಲ. ಗಿಲ್ಗಮೆಶ್ ಇಲ್ಲಿ ಪವಿತ್ರ ಕಾಡುಹಸುವಿನ ದೇವತೆಯ ಮಗ, ಎ೦ಕಿಡು ಮೃಗಸದೃಶನಾದರೂ ಸ್ನೇಹಿ, ವಿಚಾರಶೀಲ! ಶಹ್ಮತ್ ಸಹೃದಯಿ ವೇಶ್ಯೆ, ದೇವರ ದೇವ ಅನು, ಜನನದ ದೇವತೆ ಅರೂರು, ಸೂರ್ಯದೇವ ಶಮಶ್‌, ಮದಿರೆ ತಯಾರಿಸುವ ಸಿದೂರಿ, ಉತನಪಿಷ್ತಿಮ್‌ ನ ನಾವಿಕ ಉರ್ಶನಬಿ, ವಿವೇಕದ ದೇವತೆ ಇಯಾ, ಯುದ್ಧದೇವ ನಿನುರ್ತ, ಸುಂಟರಗಾಳಿಯ ದೇವತೆ ಎನ್ನಿಲ್ ಹೀಗೆ ವೈವಿಧ್ಯಮಯ ಪಾತ್ರಗಳು ಜೀವನದ ಸತ್ಯವನ್ನು ಗಿಲ್ಗಮೆಶ್‌ ‌ಗೆ ಮಾತ್ರವಲ್ಲ ಓದುಗರಿಗೂ ತಲುಪಿಸುತ್ತವೆ. ಕನಸುಗಳು ಇಹಕ್ಕೂ ಪರಕ್ಕೂ ಸೇತುವೆಯಾಗುವ ರೀತಿ ಸ್ವಾರಸ್ಯಕರವಾಗಿದೆ.

104 ಪುಟಗಳಲ್ಲಿ ಈ ಮಹಾಗಾಥೆಯನ್ನು ತೆರೆದಿಡುವುದಕ್ಕೆ ಲೇಖಕರು ಹಲವು ಸಂಶೋಧಕರ, ಲೇಖಕರ ಇಂಗ್ಲಿಷ್ ಪುಸ್ತಕಗಳನ್ನು ಅರಗಿಸಿಕೊಂಡಿದ್ದಾರೆ! ಡಾ.ಜೆ.ಬಾಲಕೃಷ್ಣ ಅವರು ಗಿಲ್ಬಮೆಶ್‌ನ ಕತೆಯನ್ನು ಕನ್ನಡದಲ್ಲಿ ಕಟ್ಟಿಕೊಟ್ಟಿದ್ದಾರೆ.

ಕಾಮಕ್ಕೆ ದೈಹಿಕ, ಮಾನಸಿಕ, ಸಾಮಾಜಿಕ, ಹಾಗೂ ದೈವಿಕ ನೆಲೆ ವಿಸ್ತಾರಗಳಿವೆ.

 ಈ ದಿನ ಡಾ.ಎಂ.ಎಸ್.ತಿಮ್ಮಪ್ಪನವರು ತೀರಿಕೊಂಡರೆಂಬ ಸುದ್ದಿ ತಿಳಿಯಿತು. ಮನೋವಿಜ್ಞಾನದ ಮಹಾನ್‌ ಅರಿವುಳ್ಳ ಪ್ರಾಧ್ಯಾಪಕರಾಗಿದ್ದರು. ನನ್ನ 1993ರ ಕೃತಿ "ಮಿಥುನ - ಲೈಂಗಿಕ ಮನೋವಿಜ್ಞಾನದ ಬರಹಗಳು" ಕೃತಿಗೆ ಮುನ್ನುಡಿಯನ್ನು ಬರೆದಿದ್ದರು. ಆ ಮುನ್ನುಡಿ ಇಲ್ಲಿದೆ. ಅಂದಹಾಗೆ ನನ್ನ "ಮಿಥುನ" ಕೃತಿ ಉಚಿತ ಡೌನ್‌ ಲೋಡ್‌ ಗೆ ಲಭ್ಯವಿದ್ದು ಈಗಾಗಲೇ 15000ಕ್ಕೂ ಹೆಚ್ಚು ಡೌನ್‌ ಲೋಡ್‌ ಗಳಾಗಿವೆ. ನೀವೂ ಡೌನ್‌ ಲೋಡ್‌ ಮಾಡಿಕೊಳ್ಳಬಹುದು, ಲಿಂಕ್‌ ಇಲ್ಲಿದೆ:

https://ia801304.us.archive.org/27/items/Mithuna-KannadaBookOnSexualPsychology/Mithuna.pdf

ಮುನ್ನುಡಿ 

ಕಾಮ ಮಾನವನ ಪುರುಷಾರ್ಥ ಮೂಲಭೂತ, ಸಾರ್ವತ್ರಿಕ ಬಯಕೆಗಳಲ್ಲಿ ಒಂದು. ಇದಕ್ಕೆ ದೈಹಿಕ, ಮಾನಸಿಕ, ಸಾಮಾಜಿಕ, ಹಾಗೂ ದೈವಿಕ ನೆಲೆ ವಿಸ್ತಾರಗಳಿವೆ. ಮನುಷ್ಯನ ಬೆಳವಣಿಗೆಗೆ ಇದೊಂದು ಅವಿಭಾಜ್ಯ ಅಂಗ, ಈ ಬಯಕೆ ಪೂರೈಕೆ ಆಗದಿದ್ದಾಗ ನಮ್ಮ ಪೂರ್ಣ ಏಳಿಗೆಗೇ ಏಟು ಬಿದ್ದಂತೆ. ನಮ್ಮ ಆದಿ ಸಂಸ್ಕೃತಿ ಕಾಮಕ್ಕೆ ಯಥೋಚಿತ ಸ್ನಾನವನ್ನು ಮುಕ್ತ ಹಾಗೂ ಗೌರವ ಪೂರ್ವಕವಾಗಿಯೇ ಕೊಟ್ಟಿರುತ್ತದೆ. ಧರ್ಮ, ಅರ್ಥ, ಮೋಕ್ಷಗಳಿಗಿರುವಂತೆ ಕಾಮಕ್ಕೆ ಸುದೀರ್ಘ 'ಶಾಸ್ತ್ರ' ಗ್ರಂಥಗಳೇ ಇವೆ. ವಿಕೃತ ಕಾಮ ಹಾನಿಕರ, ಅಷ್ಟೇ ಹಾನಿಕರ ಅಕಾಮವೂ ಕೂಡ. ಆದರೂ ಕಾಮದ ಮೇಲಿರುವಷ್ಟು ಮೌಢ್ಯತೆ, ಕಂದಾಚಾರ, ಅವಹೇಳನ, ನಿರೋಧಭಾವ ಇನ್ನಾವುದೇ ಜೀವನ ಪ್ರಾಕಾರಗಳಲ್ಲಿ ಕಂಡು ಬರುವುದಿಲ್ಲ. ಈ ಸ್ಥಿತಿಗೆ ಒಂದು ಮುಖ್ಯ ಕಾರಣವೆಂದರೆ : ಈ ಕಾಮದ ಶಕ್ತಿ, ಹರವು ಅಪಾರ; ಇದರ ನೇರ, ಸಡಿಲ, ಪೂರ್ಣ ಬೆಳವಣಿಗೆಯಿಂದ ಸೃಜನಶೀಲತೆಯೂ ಹೊಮ್ಮುತ್ತದೆ. ಅಂತಹ ಬದುಕು ಪಟ್ಟಭದ್ರ ಹಿತಾಸಕ್ತಿ ಅಥವಾ ರೂಢಿಮೂಲ ಬದುಕಿನ ಸ್ತರಗಳಾದ, ಧರ್ಮ ಮತ್ತು ಸಾಮಾಜಿಕ ಸಂಸ್ಥೆಗಳ ವಿರೋಧವಾಗಿಯೂ ನಿಲ್ಲಬಹುದು. ಅದಕ್ಕಾಗಿಯೇ ಧರ್ಮ, ಸಾಮಾಜಿಕ ಸಂಸ್ಥೆಗಳು ಕಾಮವನ್ನು ವಿರೋಧಿಸುತ್ತಲೇ ಬಂದಿವೆ : “ಮಠ” ಮೂಲವಾದ ಧರ್ಮಗಳಿಗೆ ಎಂದಿನ ಸಮಾಜ ಬೇಕೇ ವಿನಃ ವ್ಯಕ್ತಿನಿಷ್ಟ, ವ್ಯಕ್ತಿವಿಕಾಸ, ಸೃಜನಶೀಲ ಬದುಕು ಅಲ್ಲ, ವ್ಯಕ್ತಿ ತನ್ನ ಬದುಕು, ಸಮಾಜ ನಿರ್ಮಿಸುವಂತಾದರೆ, ಮಠಗಳ ರೂಢಿಮೂಲ ಸಾಮಾಜಿಕ ಸಂಸ್ಥೆಗಳ ಪ್ರಭುತ್ವ ಹೋದಂತೆಯೇ, ಆದರೆ ನಿಜವಾದ ಧರ್ಮ ವ್ಯಕ್ತಿ ಮತ್ತು ಅವನ ಪ್ರಜ್ಞೆಯ ವಿಕಾಸವೇ ಮೂಲವೆಂದು ನಂಬುತ್ತದೆ. ಎಂದಿನ, ದೈನಂದಿನ ಪ್ರಜ್ಞೆಗೆ ಹೊರತಾದ, ಹಿರಿದಾದ ಮೇಲ್ಮಟ್ಟದ ಪ್ರಜ್ಞೆಯತ್ತ ಮನುಷ್ಯನನ್ನು ಕೊಂಡೊಯ್ಯುವುದೇ ನಿಜವಾದ ಧರ್ಮದ ಮೂಲ ಉದ್ದೇಶ, ಆದರೆ ಪಟ್ಟಭದ್ರ, ಮಠಾದಿರೂಢ ಧರ್ಮ ನಿಜವಾದ ಧರ್ಮದ ಮೂಲ ಉದ್ದೇಶವನ್ನೇ ಕೈಬಿಟ್ಟು, ಮಾನವನ ದೈವಿಕ ಪ್ರಜ್ಞೆಯ ಬೆಳವಣಿಗೆಗೆ ಮಾರಕವಾಗುತ್ತಿದೆ.

ಕಾಮದ ನಿಜವಾದ ಬೆಳವಣಿಗೆ ಮನುಷ್ಯನ ಆರೋಗ್ಯ ಹಾಗೂ ಸಾರ್ವಾಂಗಿಕ ಬೆಳವಣಿಗೆಗೆ ಪೂರಕ ಮಾತ್ರವಲ್ಲದೆ ಅವನನ್ನು ದೈವಿಕ ಪ್ರಜ್ಞೆಗೂ ಏರಿಸುವ ಸುಲಭ ಸಾಧನವಾಗಬಲ್ಲದು. ಆದರೆ ಕಾಮದ ಬಗ್ಗೆ ಈಗಿರುವ ಮೌಢ್ಯತೆ , ಅನರ್ಥ, ಕಂದಾಚಾರ, ವಿಕೃತಿಗಳಿಂದ ಆ ಏಳಿಗೆ ಸಾಧ್ಯವಿಲ್ಲ. ಆದ್ದರಿಂದ ಸಾಮಾನ್ಯ ಜನತೆಗೆ ಕಾಮದ ಬಗ್ಗೆ ನಿಜ ಸತ್ಯಾಂಶಗಳನ್ನು, ವೈಜ್ಞಾನಿಕ ಸಂಗತಿಗಳನ್ನು ಬಿತ್ತಿಸುವುದು ಎಲ್ಲರ ಏಳಿಗೆಗೆ ಅತ್ಯಗತ್ಯ. ಈ ದಿಸೆಯಲ್ಲಿ ಜೆ. ಬಾಲಕೃಷ್ಣರ ಈ ಗ್ರಂಥ ಅಮೂಲ್ಯವಾದದ್ದು. ತಿಳಿಯಾದ ಭಾಷೆಯಲ್ಲಿ ವೈಜ್ಞಾನಿಕ ಮಾಹಿತಿಯೊಂದಿಗೆ, ದೈನಂದಿನ ನಿದರ್ಶನಗಳೊಡನೆ ಕಾಮದ ನಿಜಸ್ವರೂಪ, ವಿಕೃತಿ ಮತ್ತು ಏಳಿಗೆಗಳ ಬಗ್ಗೆ ಸುಲಭವಾಗಿ ಓದುವಂತೆ ಬರೆದಿದ್ದಾರೆ. ಈ ಗ್ರಂಥ ನಿಜ, ಅಪ್ಪಟ ಕಾಮದ ಪ್ರಜ್ಞೆ ಹೆಚ್ಚಿಸುವುದರ ಜೊತೆಗೆ ಬದುಕಿಗೆ ಜೀವನಕ್ಕೆ ಮತ್ತೊಂದು ದೃಷ್ಟಿಕೋನವನ್ನು, ಹೊಸ ಅರಿವನ್ನೂ ಮೂಡಿಸ ಬಲ್ಲದು.

ಡಾ. ಎಂ.ಎಸ್.ತಿಮ್ಮಪ್ಪ

ಪ್ರಾಧ್ಯಾಪಕರು

ಮನೋವಿಜ್ಞಾನ

ಬೆಂಗಳೂರು ವಿಶ್ವವಿದ್ಯಾನಿಲಯ